Nga 
Shqipëria renditet mes katër vendeve të fundit në Europë sa i përket normës së ndërmarrjeve të cilat kanë shitur mallra ose shërbimë online gjatë vitit 2022. Të dhënat nga “Agjencia Europiane e Statistikave” bëjnë me dije se vetëm 13.5% e ndërmarrjeve në vendin tonë janë angazhuar në shitjet online. Mesatarja e Bashkimit Europian për këtë tregues vlerësohet në 22.8%.
Vitet e fundit shumë prej bizneseve po shfrytëzojnë teknologjinë për të shitur produktet dhe shërbimet në internet. Sipas të dhënave të publikuara nga EUROSTAT, të dhëna këto që i referohen statistikave të tregtisë elektronike rezulton se është rritur norma e ndërmarrjeve të BE-së të cilat kanë operuar online me shitjet e tyre gjatë vitit 2022, krahasuar me vitin paraardhës.
Midis vendeve të BE-së, përqindja më e lartë e ndërmarrjeve që angazhohen në shitje online u regjistruan në Lituani, Suedi dhe Danimarkë. Në këto shtete aktiviteti i shitjeve është kryer online nga 38.4% e ndërmarrjeve në Suedi, 37.6% në Lituani dhe 36.2% në Danimarkë. Nga ana tjetër, përqindjet më të ulëta u regjistruan në Rumani, Luksemburg dhe Bullgari, ku ndërmarrjet që operuan online përbënin 11.2% deri në 14.9% të ndërmarrjeve totale.
Nëse analizën e përqendrojmë në një spektër më të ngushtë, pra duke marrë në konsideratë Shqipërinë dhe vendet e tjera të rajonit, të dhënat tregojnë se Serbia dhe Bosnje Hercegovina renditen në krye të listës përsa i përket ndërmarrjeve që aktivitetin e tyre të shitjeve e kryen online gjatë vitit 2022. Përkatësisht , shitjet u kryen online nga 28% e ndërmarrjve që operonin në Serbi dhe 23.5% e ndërmarrjeve që operonin në Bosnje Hercegovinë. Ndërsa vendin e tretë e gëzon Shqipëria ku 13.5% e ndërmarrjeve tona janë angazhuar në shitjet online duke lënë pas kështu ndërmarrjet që operojnë në Maqedoninë e Veriut, e cila renditet në fund të Europës.
*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.
Comments