Aktivitetet në internet, si renditet Shqipëria? Të parët në Europë për rrjete sociale, por në fund për informim dhe aplikime për punë

Pak kohë më parë “Scan Intel” përmes të dhënave të “Agjencisë Europiane të Statistikave” në publikimin “Aktivitetet në Internet” ka analizuar si renditet vendi ynë sa i përket përdorimit të internetit për të kryer aktivitete si: e-banking, blerje online apo edhe informim rreth shëndetit. “Scan Intel” i ka analizuar sërish të dhënat e kësaj anketë për vitin 2021, por këtë herë për aktivitete që lidhen më së shumti me rrjetet sociale si dhe me informimin. Si renditen Shqipëria mës vendeve të Europës sa i përket pjesëmarrjes në rrjetet sociale? Të dhënat janë jo pak surprizuese. Shqipëria renditet në vend të 27-të mes 37-të vendeve të marra në analizë në total. Përgjatë vitit 2021, 61% e popullsisë së Shqipërsë të cilët kanë akses në internet janë pjesë e rrjeteve sociale. Në vend të fundit me aktivitetin më të ulët në rrjetet sociale janë Franca dhe Gjermania. Gjatë vitit 2021, 45% e popullisë në Francë kanë qenë pjesëmarrës në rrjetet sociale, ndërkohë që kjo përqindje në Gjermani është 47%. Në anën tjetër të tabelës renditen vende si Islanda, Norvegjia dhe Danimarka.

Por sa % e tyre e përdorin internetin për të kryer telefonata online apo video calls? Shqipëria renditet mes vendeve me përqindjen më të lartë. Janë 78% të individëve të cilët kanë akses me internetin që e përdorin për telefonata. Për këtë tregues vihet re se vendet e rajonit pozicionohen në fillim të listës. Qipro ka përqindjen më të lartë me 85%, ndjekur nga Norvegjia. Në fund të listës gjejmë vende si Polonia dhe Gjermania.

Një nga aktivitetet e tjera të analizuara nga “Scan Intel” është edhe kryerja e kurseve (të lëndëve të ndryshme) online. Të dhënat nga “Agjencia Europiane e Statistikave” sinjalizojnë se vendi ynë ka përqindjen më të ulët të popullsisë që kryen kurse online me vetëm 3%. Përqindjen më të lartë për këtë tregues e ka Hollanda me 41%. Një tregues tjetër i cili e rendit Shqipërinë në vend të fundit është edhe leximi online i revistave apo gazetave. Të dhënat tregojnë se 46% e popullsisë me akses në internet, në Shqipëri, lexojnë gazeta apo revista online, ndërkohë që mesatarja e Bashkimit Europian për këtë tregues është 64%. Ndër vendet e para në Europë për këtë aktivtitet është Islanda dhe Norvegjia me 95% dhe 94% respektivisht.

Shqipëria gjithashtu renditet e dyta nga fundi në Europë sa i përket përqindjes së personave të cilët kërkojnë punë online apo dërgojnë aplikimet e tyre për punë. Shifrat tregojnë se vetëm 5% e tyre kanë kërkuar punë online gjatë vitit 2021, ndërkohë që përqindja më e ulët regjistrohet në Bosnje Hercegovinë me 4%. Mesatarja e Bashkimit Europian për këtë tregues është 13%, ndërkohë që përqindja më e lartë regjistrohet në vende si Danimarka dhe Finlanda me 36% dhe 34% përkatësisht.

*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.