Nga 
Sipas të dhënave të publikuara nga INSTAT dy tregues të rëndësishëm si indeksi i çmimit të prodhimit dhe indeksi i çmimit të importit kanë shënuar rritje në tremujorin e tretë të këtij viti.
‘Scan Intel’ ka analizuar këto të dhëna për të kuptuar sesi varion rritja dhe cilët janë zërat që e shkaktojnë atë. Në tremujorin e tretë të vitit 2023, indeksi i çmimeve të prodhimit arriti në 131,2. Në terma vjetorë kjo rritje përllogaritet të jetë 5.2%, ndërkohë krahasuar me tremujorin paraardhës kjo rritje është vetëm 0.5%.
Krahasimisht me tremujorin e tretë të vitit 2022, shifrat tregojnë se rritja më e madhe e çmimeve vërehet në seksionin “Industri nxjerrëse”me 8.5%, pasuar nga seksionet, “Energjia elektrike, gaz, avull dhe me ajër të kondicionuar” me 6.4%, dhe “Industri përpunuese” me 4.4%. Brenda seksionit të fundit, rritja më e madhe e çmimeve vërehet në aktivitetin “Shtypshkrimi dhe rigrupimi i mediave të regjistruara” me 19.8% përkatësisht.
Kjo rritje është reflektuar jo vetëm në produktet që tregtohen brenda vendit, por edhe jashtë tij. Përsa i përket këtij indeksi për produktet të cilat ofrohen në tregun vendas themi se rritja vjetore ka qenë 7.2% dhe rritja më e madhe e çmimeve vërehet në seksionin “Industri nxjerrëse” me 13.6%, pasuar nga seksionet “Energjia elektrike, gaz, avull dhe ajër i kondicionuar” me 8.6%, “Industria Përpunuese” me 6.7% dhe “Furnizimi me ujë, aktivitete të trajtimit dhe menaxhimit të mbeturinave, mbetjeve” me 0.6%.
Edhe për produktet që tregtohen në vendet partnere, pra për produktet që eksportohen, ky indeks ka shfaqur rritje të konsiderueshme. Krahasuar me tremujorin e tretë të vitit që lamë pas, pra vitit 2022 indeksi shënoi rritje me 1.9%. Rritja më e madhe e çmimeve është shënuar në seksionin “Furnizimi me ujë, aktivitete të trajtimit dhe menaxhimit të mbeturinave, mbetjeve” me 14%, pasuar nga seksioni “Industria Përpunuese” me 1.7%.
Nga ana tjetër, indeksi i çmimeve të importit në tremujorin e tretë të vitit 2023 arriti në 112.3. Krahasuar me të njëjtin tremujor të vitit 2022, indeksi i çmimeve të importit shënoi një rritje me 0.7%. Rikujtojmë se një vit më parë ky ndryshim ishte 8.1% . Kjo rritje është pasqyruar në të gjitha seksionet, ku peshën kryesore rreth 90.6% e zë seksioni “Industria përpunuese”, për të cilin konstatohet një rritje me 0.7%. Brenda këtij seksioni rritja më e madhe e çmimit vërehet në produktet “Shtypshkrimi dhe rigrupimi i mediave të regjistruara” me 3%. Ndërkohë që çmimet e importit të produkteve në seksionin “Energjia elektrike, gazi, avulli dhe ajri kondicionuar” shënuan një rritje me 1.0%.
*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.
Comments