KE për ekonominë shqiptare/ Ekonomia do rritet me 2.9% këtë vit, do ngadalësohet tregtia e jashtme, do ulet inflacioni

Komisioni Europian ka publikuar projeksionet e pranverës sa i përket perspektivës ekonomike për vendet e unionit dhe ato kandidate, mes të cilave edhe Shqipëria. Sa i përket projeksioneve për vendin tonë, krahu ekzekutiv i Bashkimit Europian flet për 2.9% rritje ekonomike këtë vit, nga 2.6% që sinjalizonin projeksionet e kaluara, dhe 3.8% rritje vitin e ardhshëm, nga 3.4% që parashikonte më herët komisioni.

Sa i përket indikatorëve të tjerë makro-ekonomik, projeksionet e Komisionit Europian sinjalizojnë se, norma e inflacionit këtë vit parashikohet pranë 4.6%, dhe do të zbresë pranë 3.1% vitin e ardhshëm, Papunësia parashikohet të zbresë në 10.9% këtë vit, nga 11.3% vitin e kaluar, ndërkohë që në vitin 2024 parashikohet të zbresë pranë 10.3%. Edhe borxhi publik parashikohet të zbresë lehtë, me 0.3 pikë përqindje këtë vit, pranë 64.3%.

Mes reshtave, në kapitullin dedikuar vendit tonë, Komisioni Europian thekson se, rënia e inflacionit të importit dhe mbiçmimi i monedhës vendase do të ndihmojnë Shqipërinë që ta mbajë normën e inflacionit nën 5% këtë vit.

“Rritja e konsumit privat parashikohet të dobësohet por duke mbetur e fortë, pranë 3%, si pasojë e rritjes së punësimit dhe të pagave, që do të marrë edhe më shumë nxitje nga njoftimi për rritjen e pagave në sektorin publik dhe pagën minimale. Ngadalësimi i kërkesës së brendshme projektohet të dëmtojë rritjen e importeve, në një kohë që kërkesa e dobët nga jashtë pritet të dobësojë eksportin e mallrave. Por nga ana tjetër, eksporti i shërbimeve pritet të mos ndikohet nga ngadalësimi ekonomik i partnerëve kryesor tregtar të Shqipërisë, në një kohë që vendi mbetet relativisht i lirë dhe tërheqës si destinacion turistik”-thotë mes reshtave në raport Komisioni Europian.

“Në përgjithësi, duke marrë shtysë nga qëndrueshmëria e konsumit të familjeve, rritja ekonomike parashikohet pranë 2.9% këtë vit, me eksportet neto që pritet të kenë një kontribut zero në rritjen ekonomike. Ky prarashikim është subjekt i disa rreziqeve, kryesisht të lidhura me vulnerabilitetin dhe varësinë e vendit nga kushtet atmosferike sa i përket prodhimit energjetik, si dhe mungesa në rritje e fuqisë punëtore të specializuar, përkeqësuar edhe më shumë nga emigracioni”-mbyll Komisioni Europian parashikimin për vendin tonë.

KLIKONI KËTU PËR RAPORTIN E PLOTË

*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.