Nga 
Numri i kartave bankare në qarkullim në vendin tonë ka prekur shifrën e rreth 1 milionë e 305 mijë të tillave në tremujorin e parë të vitit. Në fUnd të tremujorit të katërt të vitit të kaluar, kjo shifër fiksohej pranë 1 milionë e 264 mijë. Krahasuar me tremujorin paraardhës, rritja fiksohet në masën 3.4% tregojnë shifrat zyrtare nga Banka e Shqipërisë. Gjatë të gjithë vitit të kaluar ndërkohë, rritja ishte në masën 5.1%. Në rast se e njëjta tendencë do të vihet re gjatë tremujorëve pasardhës, atëherë 2021 do të shënonte një rekord të ri historik sa i përket termave të rritjes.
Po t`i shohim të dhënat sipas tipoligjisë së kartave bankare ndërkohë, pra krediti apo debiti, vëmë re se kartat e kreditit i janë rikthyer termave të rritjes, pas një kontraktimi të ndjeshëm gjatë vitit të kaluar, atë të pandemisë. Madje, rritja e këtyre kartave gjatë tremujorit të parë të vitit është ën masën 8%, përtej rritjes vjetore të të gjithë vitit 2019. Kjo rritje është më e madhe edhe se ajo e kartave të debitit, prej 3.1%, sinjalizojnë shifrat zyrtare nga Banka e Shqipërisë. Pavarësisht kësaj rritje, kartat e debitit mbeten ndjeshëm më të preferuara se ato të kreditit, rreth 1 milionë më shumë, ose 9.5 herë.
Ndërkohë, po të vlerësojmë termat e rritjes në tremujorin e parë të vitit sipas llojit të qarkut, Mastercard, Visa apo American Express vëmë re se vetëm Mastercard regjistrohet në rritje gjatë tremujorit të parë të këtij viti, me 7.3%. Kartat Visa kanë rënë me 0.2% krahasuar me fundin e vitit të kaluar, ndërkohë që ato American Express regjistrojnë një rënie prej 5.4%, tregojnë shifrat zyrtare nga Banka e Shqipërisë.
*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.
Comments