Çfarë ndodhi me prodhimet blegtorale në 5 vite?/ Rënie e qumështit dhe mishit, mjalti me rritje

Të dhënat e 5 viteve të fundit që lidhen me prodhimet blegtorale në vend  tregojnë një trend të qartë të rënies së prodhimit në disa  produkte tradicionale si qumështi dhe mishi, ndërsa prodhimi i produkteve të tjera si veza, leshi dhe mjalti ka qenë në rritje.  Këto ndryshime janë të lidhura ngushtë me faktorët ekonomikë dhe ndryshimet në kërkesën e tregut.

“Scan Intel” ka analizuar shifrat për të kuptuar trendet dhe luhatjet në sektorin e blegtorisë. Konkretisht, në vitin 2023, prodhimi i qumështit ka rënë me 7.17%. duke arritur në 900,568.8 ton, nga 970,167.8 ton që ishte në vitin 2022. Nëse analizojmë prodhimin e këtij produkti sipas kategorisë vëmë re se qumështi i lopës, që përbën pjesën më të madhe të prodhimit të qumështit, ka pësuar një rënie 7.22%,  ndërsa qumështi i deles dhe dhisë kanë pësuar rënie me 6.58% dhe 7.17% respektivisht.

Nga ana tjetër prodhimi i mishit gjatë vitit 2023 ishte 3.1% më pak se  një vit më parë.  Ndër kategoritë e mishit vëmë re se mishi i derrit ka pësuar një rënie drastike me 18.9% ndërsa për kategoritë e tjera rënia varion nga 1.3% në 7.1%.

Ndërsa produktet si  veza dhe mjalti kanë ndjekur një drejtim të kundërt krahasimisht me qumështin dhe mishin. Në vitin 2023 rezulton se janë prodhuar 15.2% më shumë vezë dhe 4.5% më shumë mjaltë krahasimisht me vitin 2022.

Por çfarë ndodhi me produktet blegtorale  gjatë 5 viteve?  Shifrat tregojnë se prodhimi total i  qumështit  ka pësuar një rënie prej 19.1%.Por  edhe produkti i mishit ka pasur një trend të ngjashëm. Në  harkun kohor të 5 viteve prodhimi i përgjithshëm i mishit ka rënë me 13.6%. Të kategorizuara sipas llojit themi se mishi i gjedhit dhe i derrit kanë përjetuar rënie të mëdha, ndërsa mishi i shpendit ka mbetur relativisht më i qëndrueshëm. Kjo shpjegohet edhe nga analiza e bërë më herët nga “Scan Intel” mbi numrin e krerëve i cili rezulton me rënie si dhe importi i  mishit dhe nënproduktevë të tij i cili ka ndjekur trend rritës.

Në të kundërt, mjalti ka shënuar një rritje prej 36.9% duke reflektuar rritjen e interesit për këtë produkt dhe potencialin e tij për eksport. Ndërsa prodhimi  i vezëve është rritur me 3.4%.

*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.