Të dhënat e tregtisë së jashtme për muajin qershor të këtij viti, të publikuara nga INSTAT, tregojnë për një rritje të importeve me 2.1% duke arritur kështu vlerën e 77 mld lekëve. Nëse analizojmë shifrat e importit sipas grupmallrave me vendet partnere rezulton se në 6-mujorin e parë të vitit aktual rritja më e lartë e vlerës së importeve u regjistrua me shtetet si Greqia dhe Turqia. Përkatësisht, gjatë periudhës janar -qershor 2024 me këto shtete importuam 16.8% dhe 16.73% më shumë malla se një vit më parë.
“Scan Intel” ka analizuar shifrat për të kuptuar se çfarë mallrash importuam më shumë. Gjatë periudhës janar-qershor 2024 vendi ynë importoi nga Greqia më shumë ushqim, pije dhe duhan, vlera e të cilave arriti në 9.5mld lekë, po ashtu ka importuar 5.07 mld lekë minerale, lëndë djegëse dhe energji elektrike, si dhe 4.9 mld lekë materiale ndërtimi dhe metale.
Ndërsa, nga Turqia gjatë kësaj periudhe importuam më shumë materiale ndërtimi dhe metale si dhe makineri, pajisje dhe pjesë këmbimi. Konkretisht në vlerë këto importe arrijnë në afro 11 mld lekë dhe 15 mld lekë.
Por si kanë ndryshuar importet me vendet partnere gjatë 6-mujorit të parë të vitit aktual krahasuar me të njëjtën periudhë të një viti më parë? Të dhënat zyrtare flasin për një rritje të importeve me Greqinë për artikujt prej lëkure me 697.6% dhe për “Minerale, lëndë djegëse dhe energji elektrike” me 59%. Për zërat e tjerë, importet janë rritur nga 2% në 23.2% përkatësisht.
Ndërsa, me Turqinë rritja më e madhe e importeve regjistrohet për makineri, pajisje dhe pjesë këmbimi me 75.2% dhe materiale ndërtimi dhe metale me 42.7%. Në të kundërt, importet për zërat tekstile dhe këpucë, ushqim, pije duhan dhe prodhime druri dhe letre ranë nga 9.2% në 24.4%.
*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.
Comments